нийгэм

Галаа гэрийн эзэн та өөрөө тахих нь хамгийн үр дүнтэй

ГЭРИЙН ЭЗЭН БОЛ ГАЛЫН ЭЗЭН ГЭРГИЙ БОЛ ГАЛЫГ МАНАГЧ, БАДРААГЧ ЮМ БАЙНА

Нар, сар, гал гурвыг Монголын ард түмэн мөнхөд мандан бадарч байхын бэлгэдэл гэж үздэг бөгөөд галыг шүтээн бүхний оройд залсаар ирсэн билээ. Гал бол оршихуйн хөдөлгүүр буюу амин эрчим ажээ.

Монголчуудын гал голомтыг бадраах тахилгыг дээд тэнгэрээр нь 2013 оны 6 сарын 1-нд хийсэн. Харин 2014 онд “Улаан хадаг”-ны үйлээр холбон аравнайлж өгсөн. Одоо та бүхэн үүнд нэгдэж, энгийн домыг гэр бүл дотроо хийхэд л болно.

Монгол хүний “хөх тамганы гал”, “зүрхний гал”, “сэтгэлийн буюу сүнсний гал” гэсэн гурван гал нь дүүрэн байхад хэзээ ч гундахгүй, Түүнийгээ л бадамлуулж явах ёстой юм. Үүний тулд өндөр төрийн гал, өвөг дээдсийн гал буюу ертөнцийн галтай таны өргөө гэрийн гал холбоотой байж, таныг өргөж байх ёстой юм.

“Алтан соёмбо” бол Монгол хүн та бөгөөд түүний дээр энэ л гурван гал оршдог.

Амин сайхан тамганы чинь галыг

Ачилсан амин сүнсний чинь галыг

Өгөөмөр сайхан өр зүрхний чинь галыг

Өрдөж асаагаад тэнд босгосон юм

Гэгээн сайхан ухаанд чинь

Гэрэл дандаа бадарч байдаг юм

Гайхам сайхан Монгол түмэн

Гариг ертөнцийн од юм … гэж судраар буусан.

“Улаан хадаг”-ны үйл бол Монгол түмны гал голомт, сүлд хийморийг сэргээх, буян хишгийг даллан дуудах тэнгэрээр хийгдсэн бүрэн хэмжээний нийтийг хамарсан галын тахилга, дом засал юм. Түүнд:

Гай түйтгэрийг арилгахаас эхлээд

Айл өргөөний галыг засаж

Алд биеийг тэнцвэржүүлнэ

Хор сэвийг дарж

Хосгүй их хүчийг бэлэглэж

Сонсож ухаарсан хүний

Сонор мэлмий гэрэлтэж

Бүхнийг дийлэх хүчийг өгч

Бүрэн сэтгэлийн эрч нэмнэ

Ухаарал бүхнийг танд бэлэглэж

Удмын галыг тань сэргээнэ гэж бий.

Image result for гал

Энэхүү айлдварыг та бүтнээр нь авч уншаад байхад таны өөрийн, өргөөний, төрийн, өвгөдийн гээд бүхий л галаа бадарч эрчлэгдэх болно.

Гэрийн эзэн бол ГАЛ-ын эзэн, харин гэргий бол түүнийг манагч юм. Иймээс л гал голомт ариун байхыг бэлгэдэж гэргийг анх цагаан эсгий дээгүүр өргөөнд оруулдаг. Иймд галаа өрх гэрийн эзэн эр хүмүүн удирдан тахина. Халуун ам бүлээрээ тахих нь хэнээр ч тахиулснаас илүү. Учир нь өвгөд дээдэс тань та бүхнийг харж байдаг. Домыг нь та хийгээд үйлдчихэд бусдыг нь таны өвөг, дээдэс, харсан тэнгэр тань гүйцээгээд өгнө. Тэд таны л сэтгэлийн хайраар тань сэрж манддаг юм. Галаа дээдэлж тахиж, шүтнэ гэж зүгээр л хайрлахыг хэлнэ. Тэрхүү хайр танаас л ундарч байж зөв болох юм.

Гал тахиж ирсэн олон арга, зан үйлийг үгүйсгэхгүй бөгөөд алиныг нь бишрэн дээдлэх нь таны эрх ч гэлээ Мөнх Тэнгэрийн таалалд нийцсэн, Монгол үндэсний өв уламжлалыг жинхэнэ утгаар сэргээн хөгжүүлж, өвлүүлэхэд хүн бүрийн оролцоо хэрэгтэй байгаа цаг үе билээ.

Гал тахихад бэлтгэх зүйлс: цай, сүүний дээж, будaa, тавгийн идээ, таван өнгийн хадаг эсвэл улаан хадаг, хонины үе сүүл / чанасан, 3 дахь үе/, шар тос, арц ганга байна.

Эхлээд өөрийн сэтгэлийг ариусгаж, өндөр дээд тэнгэр, гал улаан 99 тэнгэр, өвгөд дээдэс, ээж, аав гээд шүтээндээ цай, сүүний дээжээ дөрвөн зүг найман зовхистоо өргөнө. Шүтдэг уул, ус, газар эжийдээ цайны дээж, үр тарианы дээдийг өргөнө. Өргөлд 9 эрдэнийг бэлгэдэж, 9 төрлийн будаа өргөж болно.

Эцэг /ахмад хөвгүүн/ хонины үе сүүлээ барьж байгаад овог нэрсээ таниулж, бүхий л сайхан ерөөл хүслээ дуулгаад галдаа өргөнө. Энэ нь эд, идээний дээдийг бүрэн төлөөлнө. Дараа нь гэр бүлийн гишүүд шар тос, арц гангаа галдаа өргөнө. Мөн галын бурхандаа хүндэтгэл илэрхийлж, тойрч мэхийж мөргөнө.

Дээрх бүх өргөлийг өргөхдөө өөрсдийн овог нэрийг бүтнээр нь хэлнэ. Өргөлүүдээ өргөхдөө өвөг дээдсийн гал, өөрийн гал, үр удмын гал голомт ариун дагшин байж үргэлжид мандан бадарч байхын ерөөлийг айлтгаж хурайлж, уухайлна. Өргөлүүдээ өргөсний дараа таван өнгийн хадаг, тавагтай идээ зэргийг барьж, үр хүүхдээ даатган, сайн сайхан бүхнийг дуулгаж, орон дэлхийгээ магтаж, сайныг ерөөж хурайлна.

Тавагтай идээний дээжээс нь өргөөд өөрсдөө идэж хүртэнэ. Мөн есөн төрлийн будаа аягалан хурайлаад даллага авч болно.

Есөн төрлийн будаа: арвай, буудай, цагаан, шар, гөц, гурвалжин будаа, буурцаг, шош, эрдэнэ шиш.

Ерөөл, магтаал, дуу хуур зэргийг өөрсдийн тааллаар өргөх ба инээж баясаж тэнгэр, бурхад, өвөг дээдсээ хөгжөөгөөрэй. Мөн та баярлан хөгжиж, хайр ивээлээр дүүрэн болоход таны эд, эсээр дамжин өвөг, дээдсүүд, харсан даасан тэнгэрүүд баясана. Өвгөд гэдэг нь өвөг-эд, дээдэс гэдэг нь дээд-эс гэсэн утгатай байгааг анзаарч байна уу.

Энэ бүхэн чин сэтгэл, биширлийн үүднээс хийгдэж байвал тэр сайхан эрчим чинь та бүхэнд арвин их хишиг буяныг дуудаж өгөх болно.

Өөрийн сайхан галаа

Өвөг дээдэс удмын галаа

Өргөө гэрийнхээ галтай

Өргөөд та тэтгэчихвэл

Өргөн олны гал болж

Өргөжин мандахын хирээр

Өнө мөнхөд гэрэлтэх

Өгөөмөр Монгол түмний

Өршөөл нь болон батжих болно

Өндөр дээд гэгээнтний адисаар

Өөрийгөө та эрчлэн засаж

Өргөө гэрээ ариусгаад

Өвөг дээдсийн буяныг хүртэх болтугай.

Гэрийн тулга 3 бүслүүр, 3 тулгууртай байдаг бол төрийн тулга 3 бүслүүр, 7 тулгууртай байх ёстой.

Өнөө цагт байр орон сууцанд амьдардаг хүмүүст гал тахих хүндрэлтэй байдаг. Ам бүлээрээ цуглаж, цэвэрхэн газар очин түүдэг асааж, галаа тахиж болно. Сонгосон газартаа будаа өргөөд, түүдэг асаах газраа “түгээл” буюу өмнөх тахилгын үнс арц, ганга цацаж дэвсээд, дээр нь мод, аргалаа зэрэглэж галаа бадраана.

Ингээд галын тахилгаа хийсний дараа үнснээс нь авч гэртээ хадгална. Үүнийг “түгээл” гэж бас нэрлэдэг шүү дээ. Энэ үнсийг гэртээ (байрандаа) авч ирж тулгандаа хийгээд тохирсон гал асааж явж бас болно. Гэргий хүн галаа өглөө, оройд мандааж, манаад байхад өрх гэрийн амьдралд сэв орохгүй ариун байдаг.

Буруу зөрүү бодолтой нэгнийг ариун голомтондоо хүргэх, галдаа бохир оруулахыг цээрлэдэг. Гал голомтоо бузарлаад байвал гай барцад салдаггүй юм шүү. Галын хайч дээгүүр алхахыг хүртэл цээрлэдэг шүү дээ.

ГАЛ ГОЛОМТ ТАНЬ АРИУН ДАГШИН БАЙХ БОЛТУГАЙ

Холбоотой мэдээ

Leave a Reply

Your email address will not be published. Required fields are marked *

Close
Close