Connect with us
startMiner - free and simple next generation Bitcoin mining software

Хүмүүсийн эргэн тойронд | Humuus.Mn

“ҮХЭЭНЦ” ҮЙЛДВЭРЧНИЙ ЭВЛЭЛИЙГ ТАТАН БУУЛГАЯ

Мэдээ

“ҮХЭЭНЦ” ҮЙЛДВЭРЧНИЙ ЭВЛЭЛИЙГ ТАТАН БУУЛГАЯ

Манж улсын шилдэг дайчид дэлхийн талыг эзэлж явсан түүх бий. Тэдний хурдан морь, хурц сэлэм дор сөхөрсөн улс орон олоон. Хаад ноёдынх нь хээл хахууль, эрх ямбанд шунах шунал, өнгө мөнгөнд өнхөрсөөр Манж улсыг түүхийн хуудаснаас арчиж цээрлүүлсэн билээ. Түүнтэй адилхан 100 жилийн ойгоо тэмдэглэж буй Монголын Үйлдвэрчний эвлэл өдөр ирэх тусам нэр нөлөөгөө алдан цөөн хэдэн хүний өдөр өнжүүлэх болжээ.

Богд хаанаас үүдэлтэй, Ардын засгийн үеийн залуус Монголын үйлдвэрчний эвлэл гэдэг байгууллагыг төрийн ордонтойгоо зэрэгцүүлэн сүндэрлүүлсэн байдаг. Яагаад тэр вэ? Ажилчин, тариачин, багш эмч, урлагынхан гээд бүхий л хөдөлдөг, ажилладаг, дуулдаг хүмүүсийг эрхийг хамгаалах гэж шүү дээ. Гэтэл өнөөдөр дөрвөн давхар байшингийнхаа түрээсэнд бялуураад, аз жаргал, архи дарсаар бялхсан нөхдүүд олон нийтийн сүлжээгээр харагдах болжээ.

Анх АНУ-ын Ерөнхийлөгчдөд дийлдэхээ байсан, тэднийг удирдах болсон монополийг (Ж.Морган, Карнеги, Рокефеллер, Ротшилд, Вандербилти) задлахын тулд “үүрэнд” нь Үйлдвэрчний эвлэл байгуулсан түүхтэй. Олон нийтийн нүд чих, хяналт Үйлдвэрчний эвлэл юм. Дэлхийн баячуул, топ компаниуд хойд Солонгосын цөмийн зэвсэглэлээс илүү Үйлдвэрчний эвлэл хүчирхэгжихээс айдаг билээ.

Харин манайд бол эсрэгээрээ Монголын Үйлдвэрчний эвлэл гэдэг байгууллага утга учраа алдсан. Тэд оймс нэхдэггүй, талх барьдаггүй, ган хайлуулдаггүй, хүүхдэд хичээл зааж, хүн эмчилдэггүй. Уг нь тэр нэхдэг, заадаг, хайлуулдаг хүмүүсийн эрх ашгийг хамгаал, ажлын байрны төлөө санаа тавь гэж Богд хааны үеэс байгуулсан юм билээ.

Монголын Үйлдвэрчний эвлэл чөлөөт зах зээлийн эрин үед (Жинхэнэ хүчирхэгжих ёстой үедээ) зорилго чиглэлээ алдаж, ажилчдын эрх ашгийг гэхээсээ амин хувиа хичээдэг болжээ. Хэдхэн хоногийн өмнө багш нар ажил хаялаа, эмч нар ч гэсэн бид зүгээр суухгүй гэж мэдэгдэж байна. Тэдний зөв. 30 жил ардын хүүхдэд хичээл заасан багш 600 мянган төгрөгийн цалин авч байгаа. “Централ тауэр”-т байдаг хоолны газрын зургаан таваг хоолны л үнэ. Арай дэндүү юу, үгүй юу. Тэд монгол улсын ирээдүйг, хөгжил дэвшлийн бүтээгдэхүүнийг давтаж байгаа улс.

Эмч ч нар ялгаагүй, нойр хоолгүй шахам бусдын амь насыг аврахын төлөө явцгааж байна. Тэд нар өнөөдөр ажлын байр дээрээ зогсож байх учиртай. Харин Монголын Үйлдвэрчний эвлэлийн байгууллага тэдний өмнөөс цалин хөлс, ажлын байрны нөхцөл, эрх ашгийг хамгаалаад явах үүрэгтэй. Тэд үүргээ умартаад “занхайчихсан” амьтад багш, эмч нарыг араасаа гүйлгэж явна.

Багш нарын байдал хүндэрчихээд байхад Монголын Үйлдвэрчний Эвлэлийн удирдлага Хөвсгөл далайд зугаалж явна. Бөөн архи дарс, тэврэлдсэн хүмүүсийн зураг пэйсбүүкээр дүүрэн. Ингэж болохгүй шүү дээ. “Цэргийг мянган өдөр тэжээж нэг өдөр ашиглана” гэдэг шиг Үйлдвэрчний эвлэлийн байгууллагыг хэрэгтэй үед “зарцлах” гэж байгуулсан юм шүү. Хэрэгтэй үедээ хэрэглэнэ гэж тэдийг Засгийн газар шиг ордонд суулгаж, сувилалын газарт амрааж, өөрсдийгөө хэвлэлүүдээр магтаж, МҮЭ-ийн ордондоо тоглолт явуулж, хөлбөмбөгийн талбайдаа гүзээгээ багасга гэж бэлдэж өгсөн. Тэд хаан биш цэрэг шиг байх учиртай.

Үйлдвэрчний эвлэлийнхэнд эрх бас үүрэг бий гэдгээ Х.Амгаланбаатар, Г.Адъяа, саяхан төрийн одон медалиа угаасан С.Эрдэнэбат умартсан. Үе үе гавьяа байгуулсан аятай “Засгийн газартай хамтарч ажиллах боллоо” гэж хэвлэлийн бага хурал хийнэ. “Гурван талт хамтын ажиллагаанд гарын үсэг зурлаа” ч гэх шиг. Үндсээрээ буруу яваад байна. Монголын үйлдвэрчний эвлэл Засгийн газраас, Хөдөлмөр, нийгмийн хамгааллын яамнаас хамтын ажиллагааны төлбөр гэж мөнгө авна.
Засгийн газраас Монголын үйлдвэрчний эвлэлийг хэлгүй, дүлий, үхээнц мэт аашилсанд урамшуулан “чихрээр” шагнаж байгаа хэрэг. Үйлвэрчний эвлэлийнхэн гэхээр кофе сурагласан, бэлцийж балцайсан нөхдүүд үзэгдэх. Тэдний бие биенээ шагнах, энэ тэр яах вэ. Хамгийн гол ажилчин ангийн эрх ашиг хохироод байна цаана чинь. Нэг ийм хамгаалдаг байгууллага бий учраас багш, эмч нар эрс шийдэмгий арга хэмжээ авч чадалгүй тэдэнд найдаад байгаа хэрэг.
Багш эмч нарыг ажил хаяхтай зэрэгцүүлэн Хөвсгөл далай дээр архидаж яваа, гишүүдийн татвараар цалинждаг Монголын Үйлдвэрчний эвлэлийг Холбоо тэднийг дэмжихгүй гэдгээ илэрхийлсэн хэрэг юм. Уг нь “Агтны хариу жилдээ, аяганы хариу өдөртөө” гэдэгсэн. Нэгэнтээ Монголын Үйлдвэрчний Эвлэлийн Холбоо нь “Таван толгой” ХК-ийн ажилчдын тэмцлийг дэмжихгүй, Засгийн газартай ажиллана гэж байсан удаатай. Сануулахад нэг нөхөр “Шатвал шатчихья” гээд өөрийгөө дүрэлзүүлчихдэг. Ажилчин эрийг өөрийгөө шатаах хэмжээнд хүргэсэн та нар ч дээ.


Гадны хөрөнгө оруулалттай аж ахуйн нэгжүүд монголчуудыг газар шороон дээр нь ялгаварлан гадуурхдаг үзэгдэл хэвийн. Тухайлбал Оюутолгой компанийн Австрали мэргэжилтэн 80 мянган ам.долларын цалин авч байхад Монгол инженер 800 мянган төгрөг авч байна. Энэ байгалийн баялагийн тэгш хувиарлалт уу, ялгаварлан гадуурхалт уу. Томоохон уурхай, барилгын компаниуд ажилчдын цалинг өгөхгүй унжиж, төрөл бүрээр дарамталдаг.
Ажилчид ажилтай байхын тулд хэл ам хийхээс айн чимээгүйхэн алхаж явна. Эзэд цаг ямагт хямд ажиллах хүчин, бага цалин, их ашгийн төлөө явж ирсэн. Тэдэнтэй тулах, хөндлөнгийн эр зоригтон өнөөдөртөө алга. Тийм учраас Монголын Үйлдвэрчний эвлэлийн Холбоо гэдэг байгууллагыг татан буулгая гээд байгаа юм. Зарим дарга нь хөлбөмбөгийн талбай, энд тэндхийн газраа сэмхэн зарж татан буулгаад эхэлсэн сураг байна лээ. Ухамсартай гэдэг нь.
Цөөн хүний асрамжийн газар шиг болсон Монголын Үйлдвэрчний эвлэл гэдэг байгууллагыг татан буулгаад байр саванд нь цэцэрлэг, сургууль оруулья. Тэгээд ч бусад холбоодоос муу ажиллаж байгаа МҮЭХ байртай, сувилалын газартай байх нь нэн зохимжгүй болжээ. Хэн ч үгийг нь сонсохоо байсан ийм тоглоомын байгууллагаас татгалзаж ажилчин ангийнхан өөрийн хүчинд найдахаас өөр арга үлдсэнгүй. Эд нарт хандсанаас Г.Уянга, “Цэнхэр үст” Э.Цэрэн, “Босоо хөх Монгол”-чууд өөр хэн билээ тэдэнд хандвал машин тэргээ унаад хэвлэлийн багаа дагуулан гүйгээд ирнэ.
Монгол Улсад цалин хөлс, хөдөлмөрийн аюулгүй байдал, чихтэй төр засаг гэж алга. Идэрхэн залуус амь зуухын тулд гадаад руу боолын хөдөлмөр хийх гэж зугтсаар байна. Энэ бүхний бурууг Монголын Үйлдвэрчний Эвлэлийн Холбоо хүлээх учиртай байгууллага. Зуун жилийн ойгоо тэмдэглээд зуун грамм архи ууцгаагаад тарчихвал ажилчин анги арай өөр хамгаалагч олчихоор байна.

 

О.Саруултуяа

Continue Reading
Холбоотой мэдээ
2 Сэтгэгдэлтэй

2 Сэтгэгдэлтэй

  1. Anonymous

    2017-09-25 at 10:47

    yun hutssan yum bichdeg gichii ve

    • Anonymous

      2017-09-26 at 03:33

      Энэ даам гарчихсан удирдагуудыг нэгмөсөн Үйлдвэрчний эвлэлээс зайлуулаад. Чаддаг хүнд нь өгвөл дээр биз дээ. Дэмжиж байна

Сэтгэгдэл бичих

Уншигчдын бичсэн сэтгэгдэлд humuus.mn хариуцлага хүлээхгүй болно. ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

startMiner - free and simple next generation Bitcoin mining software
To Top