Бусад хүмүүс

Чихрийн шижинтэй болсоныг илтгэх шинж тэмдэгүүд

Чихрийн шижингийн улмаас цусан дахь сахарын хэмжээ ихэссэнээр хүний бие махбод инсулин үйлдвэрлэх болон инсулинд хариу үйлдэл үзүүлэх чадвар багасдаг байна. Энэхүү өвчний эхэн үеийн шинж тэмдгүүд нь маш түгээмэл учраас бид тэр болгон ач холбогдол өгдөггүй. Гэтэл чихрийн шижинг эмчлэхгүй байх нь таны амьдрах хугацааг богиносгож, эрүүл мэндэд тань сөрөг үр дагавар учруулдаг тул аль болох эрт оношлож, эмчлүүлэх нь зүйтэй юм.

1. Ам цангаж, шингэн их ялгаруулах

Ам их цангах, шингэн их ялгаруулах нь чихрийн шижин өвчний хамгийн нийтлэг учирдаг шинж тэмдэг юм. Чихрийн шижингийн үед бөөр таны илүүдэл сахарыг шингээж чадахгүй. Тиймээс эс бүрээс тань шингэнийг шавхан авч шээстэй хамт гадагшилдаг. Энэ нь шингэн ихээр ялгаруулж, ам цангах мэдрэмж төрүүлдэг. Цангаагаа тайлхын тулд их уух нь бүр илүү шээс хүргэнэ.

Хэвийн хүний хувьд өдөрт 6-7 удаа шээх ёстой байдаг бөгөөд 4-10 удааг хэвийн гэж тооцдог.

2. Өлсөх

Өлсөх болон дээр дурдсан 2 шинж тэмдгүүд нь чихрийн шижингийн үед хамгийн их тохиолддог шинж тэмдгүүд билээ. Хэрвээ таны бие хангалттай хэмжээний инсулин ялгаруулахгүй эсвэл хэвийн байдлаар харилцан үйлчлэхгүй байснаар хоолыг глукоз буюу эсүүд энерги болгон ашигладаг зүйлийг үйлдвэрлэхгүй гэсэн үг юм. Энэ нь хоол идсэн ч цадахгүй, өлсөж байгаа мэдрэмжийг төрүүлж байдаг. Үнэндээ идэх нь цусан дахь сахарын хэмжээг бүр ч илүү өсгөж байдаг байна.

Өөр ямар нэг чихрийн шижингийн шинж тэмдэг илрээгүй ч Хоол идсэн хирнэ өлсөөд л байвал эмчид хандахыг зөвлөж байна.

3. Ядарч сульдах

Мөн чихрийн шижингийн үед элбэг тохиолддог шинж тэмдэг нь байнгын сульдаж ядрах явдал юм. Үргэлж ядарч, унтмаар санагдах нь үргэлж өлсөхтэй ижил шалтгаантай буюу эд эсүүдэд энерги болох хангалттай глукоз байхгүй байгаатай холбоотой. Байнга шингэн гадагшлуулах нь бас ядарч сульдахад нөлөөлдөг.

Ядрах нь өөр олон төрлийн нөхцөл байдлын улмаас үүсэж болох бөгөөд зарим нь бүр эрүүл мэндийн шалтгаантай холбоогүй байх талтай. Гэхдээ энэхүү жагсаалтын бусад шинж тэмдгүүдтэй хамт илрэх юм бол чихрийн шижинтэй холбон тайлбарлаж болно.

4. Хараа муудах

Хараа муудаж, бүрэлзэх нь нүдний ямар нэг эмгэгтэй холбоогүй бол чихрийн шижин үүссэний эхэн үеийн шинж тэмдэг байх магадлалтай. Энэ нь шингэний хөдөлгөөнөөс хамааралтай бөгөөд нүдний хүүхэн хараа хавдах, хэлбэр дүрсээ өөрчлөх зэрэг зүйл тохиолддог. Үүнээс болж таны хараа муудах, бүрэлзэх, фокусаа алдах гэх мэт асуудлууд илэрнэ.

Цусан дахь сахарын хэмжээ эргэн хэвийн байдалдаа ороход эдгээр шинж тэмдгүүд арилах боловч бүрэн эмчлээгүй тохиолдолд харах чадвараа алдах эрсдэлтэй.

5. Шалтгаангүйгээр жин хасах

Та ямар нэг хоолны дэглэм бариагүй, идэвхитэй дасгал хөдөлгөөн хийгээгүй байхад их хэмжээний жин хаясан уу? Энэ нь мөн л энерги зарцуулалтанд ашиглагдах глукозын хэмжээ бага болсны улмаас өөх болон булчинг энерги болгон шилжүүлж, жин хасахад хүргэж байгаа юм. Шингэний дутагдал нь мөн гэнэт жин хасахад нөлөөлнө. Учир нь шээс ялгаруулахын тулд бие махбод биен дэхь бүх шингэнийг хураан гаргадаг.

Гэнэт их хэмжээний жин хасах нь 1-р төрлийн чихрийн шижингээр өвдсөн хүмүүст түгээмэл тулгардаг ч 2-р төрлийн чихрийн шижинтэй хүмүүст ч бас илэрдэг.

6. Арьс загатнах

Дээр дурдсанчилан, илүүдэл сахар нь шээсээр дамжин гарахын тулд арьсан дахь шингэнийг хүртэл ашигладаг. Хуурай арьс нь загатнаа үүсгэх бөгөөд үүнийг маажих нь арьс гэмтэж, үрэвсэх үндэс болдог байна. Мөн загатнааны бас нэг үүсэх шалтгаан нь чихрийн шижинтэй хүмүүст ихэвчлэн тохиолддог мөөгөнцрийн халдвар ажээ.

7. Эдгэрэх чадвар удаашрах

Зүсэлт, шарх зэрэг тань удаан эдгэрэх нь цусан дахь сахарын хэмжээнээс хамааралтай юм. Цусан дахь сахарын хэмжээ ихсэх нь шархыг үрэвсэх үндэс болохоос гадна цусны эргэлтийг удаашруулж, тухайн хэсэгт цус очиж, эмчлэх явдлыг бууруулдаг байна. Энэ асуудал нь ялангуяа хөлний шарханд нөлөөлдөг бөгөөд чихрийн шижинтэй өвчтөний хөл гэмтэж, илүү ноцтой асуудал үүсгэх магадлал өндөр байдаг.

Хэрвээ таны шарх өмнөхөөсөө удаан хугацаанд эдгэрч байгаа бол эмчид энэ талаар дурдах хэрэгтэй.

8. Арьсан дээр толбо үүсэх

Акантосис нигриканс гэдэг нь арьс харлаж, хилэн юм шиг гадаргуутай болох эмгэг юм. Эдгээр толбонууд нь хүзүү, суга, цавь, тохой, өвдөгний дотор тал, хурууны үе зэрэг арьс хуйларсан эмзэг газруудад ихэвчлэн гардаг байна.

Эрүүл мэндийн хувьд эрүүл хүмүүст ч тохиолдож болох энэ нөхцөл байдал нь чихрийн шижин үүссэн болон үүсэх гэж байгаа хүмүүст түгээмэл тохиолддог.

9. Гар хөл бадайрах, ирвэгнэх

Гар хөл мэдээгээ алдах, ирвэгнэх, бадайрах зэрэг нь цусан дахь сахарын хэмжээ ихэссэнээс үүдэн цусны эргэлт муудаж, мэдрэлийн эсүүд гэмтсэнтэй холбоотой юм. Гар болон хөл нь зүрхнээс хамгийн хол байрлах тул энэ шинж тэмдэг нь хамгийн эхэнд эдгээр эрхтэнүүдэд илэрдэг.

Чихрийн шижин нь эрүүл мэндэд ноцтой хохирол учруулж мэдэхүйц эмгэг учраас эртхэн зөв оношлуулж, эмчлэх нь зүйтэй. Дээрх шинж тэмдгүүд хэрвээ танд илэрсэн бол мэргэжлийн эмчид үзүүлж, зөвлөгөө авах шаардлагатай.

source: caak.mn

Холбоотой мэдээ

Leave a Reply

Your email address will not be published. Required fields are marked *

Close
Close